重開感言

「靚記茶餐廳」以網誌實體店形式創業於1998年10月1日,為本土文膽魚皮、好立克和小點子創立。三人可謂本土網誌寫手先鋒,昔日以港式茶餐廳概念,招聚各方友好街坊網上論盡港人港事。後來,幾番人事更替,有奶茶王子、輝記和大頭妹加入,一眾夥記有心有力把「靚記」搞得風山水起。後來,經營約十年後,各夥記因各自事忙,未能繼續「靚記」,實為憾事。

此後各人都一直對此耿耿於懷,苦苦追憶,念念不忘,大家都希望有日重開「靚記」。

念念不忘,此為緣起。

然後,物轉星移,十年人事幾番新,差不多又十年,夥計仍走在一起,去到邊都如置身「靚記」,到處忘我地高談闊論,處身今時今日荒謬之城,茶餐廳又有重開的理由。

荒誕的人與事,已到了與我們24/7同在的境界,牛鬼蛇神大話精各種乜膠遍地遊走,眾街坊日日被逼睇見一眾騎呢妖魔現真身,確實難免納悶憂心憤恨又抑鬱,有時想搵人呻吓,或有時想聚埋恥冷笑吓粗言穢語吓、又或者,其實日子還是要過,大家仍可有尊嚴地風花雪月、分享生活美好、八八掛掛又一day。

所以想搵個地方。 街坊心諗:「靚記」你仲唔開番等幾時 !?

想當初,找個地方就是要夠本土,便找間香港人人驕傲既「茶餐廳」。「靚記」開鋪意念旨在集合街坊街里聚首一堂,唔理你嚟係為咗多元本土美食、為了凝聚正氣、或是純粹搵人搭訕解悶。

換句話說,「靚記」精神就是要秉承本土港式茶餐廳傳統,夠多元、夠靈活多變、夠立雜、要乜有乜:絲襪奶茶鮮油多牛腩河出爐蛋撻不在話下,夥記包保千奇百怪,你想要咩即管出聲,飛沙走奶走埋茶都仲得,咩都有商有量。

於是,「靚記」要重開來迎合街坊需要和本土熱潮 !

先此聲明,「靚記」既是本土先鋒,其精神係民主自由,話題無上限,吹水擲地有聲,語言不分貴賤,你敢吹我敢回。我哋24/7全情開放,只要你唔係有你講冇人講嘅維園亞伯或亂開帳號嘅強國五毛,歡迎呢度打躉,盡情吹水放風。

總之,歡迎光臨。

魚皮 FISH 2016.9.13

參考:1998年靚記創業宣言 http://langkei.com/old/blog/menifesto.html